Musanze: Korali de Kigali y’i Musanze yemeje mbarwa bari bitabiriye Christmas Carols Concert 2025, yongera gusabwa ibintu bibiri byoroshye

Nk’uko isanzwe ibigenza mu mpera z’umwaka, Korali Ishema Ryacu ikorera ubutumwa kuri Paruwase Katedrale ya Ruhengeri yateguriye abakunzi bayo igitaramo Chrismas Carols Concert mu rwego rwo kubafasha kwizihiza iminsi mikuru isoza umwaka: Noheli n’Ubunane. Carol concert ubusanzwe  ni igitaramo cy’indirimbo za Noheli (Christmas carols) gikorwa mu gihe cy’iminsi mikuru ya Noheli, aho amakorali cyangwa abahanzi baririmba indirimbo zifite insanganyamatsiko yo kwibuka ivuka rya Yezu no kwishimira umwaka mushya.

Chrismas Carols Concerr y’uyu mwaka kikaba cyarabaye kuri iki cyumweru taliki ya 28/12/2025 muri Salle ya Centre Pastorale Notre Dame de Fatima.

Korali Ishema  itegura iki gitaramo , ni imwe muri Korali zizwi cyane kuri Paruwase Katedrale ya Ruhengeri, hakaba hari abayigereranya na Korali de Kigali kubera imiririmbire yayo ijya kwisanisha n’iya Korali ya Kigali yamaze kwamamara mu gihugu cyose.

Ni igitaramo Umunyamakuru wa Virunga Today yashoboye gukurikirana kuri channel ya Youtube yari yashyiriweho iki gitaramo ndetse ashobora no kugereranye imigendekere yacyo n’iy’icyatambukijwe mu mwaka wabanjirije uyu wa 2025.

Christmas Carols Concert ya Korali Ishema Ryacu nziza ku rwego rumwe n’iya Korali de Kigali.

Ibi ni ibyakwemezwa na buri wese washoboye gukurikirana iki gitaramo kuva cyatangira kugeza ku musozo ahereye ndeste  ku muteguro ubwawo wari ubereye iyi concert.

Bitandukanye n’iyatambukijwe mu mwaka wa 2024, iyateguwe uyu mwaka yaranzwe n’indirimbo nshya  zitari zisanzwe zikoreshwa muri iki gitaramo, izindi zisanzwe ziririmbwa mu Kilziya zihindurirwa amajwi ziririmbwa ku buryo bwa gihanga zirushaho kuryohera abitabiriye iki gitaramo.

Korali kandi yagize n’akanya ko kuririmba indirimbo zisanzwe zacuranzwe n’abahanzi b’abanyarwanda nazo zikaba zacuranzwe zinaririmbwa mu buryo bwa gihanga twavuga nk’indirimbo:” Nibuka ya ndoro nibuka ya nseko na uyu mwana niwe Mahoro zanyuze aba bitabiriye igitaramo.

Ariko indirimbo zabaye iz’agahebuzo, zigashimisha cyane abari bitabiriye iki gitaramo ni indirimbo bita  solo. Izi ni indirimbo  ziririmbwa n’umuhanzi umwe (cyangwa babiri ) wenyine, aho ijwi rye ari ryo rihabwa umwanya wihariye kandi rikaba ari ryo rishingirwaho mu ndirimbo. Muri iki gitaramo hakaba haririmbwe indirimbo 2 za solo zakoze ku mutima abari bitabiriye iki gitaramo. Koko rero abari aho bashimishijwe n’ijwi ryiza ry’uwitwa Celine, ijwi  ryibutsa iry’umunyamerika kazi w’icyamamare muri muzika Houston Whitney. naho abitwa Charite na Honore bo mu ndirimbo baririmbanye zikaba zaribukije indiriimbo z’igihinde zakanyujijeho mu gihe cyashize no muri iki gihe ndetse hakaba hari abakizikunze.

Nk’uko bisanzwe kandi muri bene ibi bitaramo, abari bacyitabiriye bahawe n’umwanya wo kugenera impano Korali , iyi Korali ikaba isanzwe ifite abaterankunga benshi bayifasha muri iki gikorwa cy’ubutumwa. Korali kandi yagejejweho ubutumwa buyishyigikira burimo ubw’Umukuru w’Intara y’amajyaruguru ndeste n’ubw’Umwepiskopi wa Diyoseze gatolika ya Ruhengeri.

Ibintu bibiri byoroshye byasabwe Korali Ishema Ryacu.

Nubwo iki gitaramo cyabaye icy’agahebuzo, bikaba bigaragaza imyiteguro ikaze yakozwe na Korali muri uyu mwaka, hari abakristu basanzwe bakunda kwitabira concert z’amakorali babwiye Virunga Today ko hari ibintu bibiri bikwiye kwitabwaho kugira ngo iki gitaramo kirusheho kwitabirwa ku rwego rumwe n’ibisanzwe bikoreshwa na Korali zindi nka Fatuma cyangwa  Magnificat nazo zikorera ubutumwa kuri iyi paruwase, cyangwa se mu mpembero yo gutera ikirenge mu cya Korali de Kigali ubu isigaye yuzuza Bk Arena mu gitaramo nk’iki.

Ibyo bintu ni ibi:

1. Guhitamo neza umunsi w’igitaramo cya Christmass Carols Concert.

Iki ni ikibazo Virunga Today yagarutseho mu nkuru zayo zahise, aho yagaragaza ko guhitamo gukora iki gitaramo Noheli yararangiye isanga atari byiza kuko aho kugira ngo concert ibafashe kwinjira mu bgishimo bya Noheli, iza hasozwa ibyo byishimo bikaba byumvikana ko ibintu biba bishyushye igihe ufashwa kwinjira zwa kurusha igihe ufashwa gusohoka.

Ibi ninabyo imbuga nyinshi zo kuri internet zemeza zigaragaza ko iki gitaramo cyashyirwa muri bimwe bigize imyiteguro ya Noheli, kikaba kigomba gukorwa mu byumweru bibiri bibanziriza Noheli. Izi mbuga zongeraho kandi ko gukora iki gitaramo  muri kiriya gihe byorohereza imyuteguro y’ibirori bisoza umwaka: ubunane.

Gusa ubwo Virunga Today yabazaga bamwe mubagize korali impamvu bahitamo gutegura Carols concert Noheli yararangiye, bashubije ko biterwa na gahunda nyinshi abapadiri basanzwe babafasha mu gutegura baba barimo zijyanye n’umunsi mukuru wa Noheli, ariko ntibagaragaza ibyo ba padiri babafashamo n’izo gahunda zindi zidasanzwe baba barimo cyane ko kuri ubu Diyoseze ifite abapadiri bahagije, gushaka abakwita by’umwihariko kuri Korali iri mu gikorwa nk’iki cy’iyogezabutumwa akaba atari ibintu bigoranye. Ttwaboneraho kubabwira kandi kuva Korali de Kigali yatangira gukora ibitaramo nk’ibi, nta na rimwe iragihitisha nyuma ya Noheli, byose byagiye bitambutswa mbere ya Noheli, icy’uyu mwaka wa 2025 cyabaye ku cyumweru taliki ya 21/12/2025 muri Camp Kigali.

Ku bijyanye nanone n’amahitamo y’umunsi w’igitaramo, icy’uyu mwaka cyaraye kibaye, umunnyamakuru wa Virunga Today yahisemo kuratira imigendekere myiza yacyo bamwe mu bakristu, ababwira ko bacitswe maze bose bamusubiza ko nta mahitamo bari bafite e uretse gutaha ubukwe bwinshi bw’abari babatumiye bahawe amasakramentu kuri Paroisse Cathedrale ya Ruhengeri. Ibi bivuze rero ko abategura iki gitaramo bakagombye kujya  bareba italiki nziza, itariho gahunda nyinshi zigomba kwitabirwa n’abakristu, mbese nko muri week end ibanziriza umunsi mukuru wa Noheli.

2. Kugabanya ibiciro byo kwinjira no gushaka mu gihe kizaza ahantu hagari ho gukoreshereza igitaramo.

Uretse ikibazo cy’amataliki yo gukoreraho igitaramo cyagaragajwe n’abakristu nk’imbogamizi yo kudashobora kwitabira iki gitaramo, hari abandi bakristu bagaragaje ko ibiciro byo kwinjira biba biri hejuru cyane ( 5000 na 10.000) ku buryo bigoye kubyigondera.

Aba bakristu kandi iki kibazo cy’amatike ahenze bagihuza nuko basanzwe bafata iyi Korali nk’iy’abifite, abakire, bakaba bibaza impamvu ihitamo guhanika ibiciro kandi Korali mukeba wayo, Mwamikazi ikoresha ibitaramo, abakristu bakinjirizwa ubuntu, igituma muri rusange abakristu benshi bibona nanone muri Mwamikazi kurusha uko bibona muri Ishema, Mwamikazi bakaba bayifata nka Korali ya Rubanda.

Gusa nanone kumanura ibiciro cyangwa kwinjiriza ubuntu ntabwo ari wo muti kamara watuma ibitaramo by’aya makorali byakwitabirwa na benshi, kuko hari n’ikibazo cya salle nto yifashishwa muri ibi bitaramo kuko itakira abarenze magana atanu, bikabije!. Iki akaba ari nanone ikibazo rusange ku batuye umujyi wa Musanze kuko kugeza ubu nta salle ihari yakwakira nibura abageze ku gihumbi, amakuru ahari akaba ari uko akarere karimo gushakisha umuterankunga wafasha mu kubaka convention Center ya Musanze, yazakemura burundu iki kibazo.Hagati aho hatekerezwa ukuntu ibitaramo nk’ibi byajya bibera ku Ngoro ya Bikiramariya nubwo kwishyuza yenda byagorana.

Tubabwire ko munenge zidakanganye abakurikiye iki gitaramo bagaragaje harimo akazi kakozwe na MC, uwagaragaye muri iki gitaramo akaba ngo atari muri babandi basanzwe bamenyerewe mu bitaramo cyangwa mu bukwe bubera mu mujyi wa Musanze, haba mu mvugo yagiye akoresha haba no muri rusange uko yatunganyije akazi ke, ngo nta bunyamwuga yagaragaje.

Humvikanye kandi n’umwe mubari bitabiriye igitaramo wahawe ijambo, agakoresha imvugo idakwiye igihe yasaga n’uburanya, asa  abwira nabi Nyiricyubahiro Mgr ( yise Nyakubahwa), amubwira ko atumva impamvu atitabira ibirori byabo, incuro zikaba zimaze kuba 3 zose, bamutumira akabaca amazi!!!!

Muri rusange iki gitaramo cyongeye kwerekana ubuhanga bwa Korali Ishema Ryacu, igaragaza ko bishoboka ko yatera ikirenge mu cya Korali de Kigali, biha n’umukoro Korali z’abakeba ( Korali Mwamikazi wa Fatima) zihora zihanganye n’Ishema mu ruhando rwo kwigarurira imitima y’abakristu basengera kuri Paroisse Cathedrale ya Ruhengeri

 

 

 

Inkuru bifitanye isano:  

Musanze: Bategurirwa igitaramo kibinjiza muri Noheli kigakorwa Noheli yararangiye

Umwanditsi: Musengimana Emmanuel