Virunga Today mu binyamakuru byafashe iya mbere mu kuburira abanywi b’inzoga no guhangana n’abakora inzoga z’inkorano

Kuva Virunga Today yashingwa, imyaka 2 yararangiye, ikiha intego yo gushyira immbere ubumenyi ku bw’iterambere rya bose, ntiyahwemye gukangurira abasomyi bayo kwirinda umuze bakururirwa n’indwara zitabarika zihora zirekerereje ngo zihungabanye ubuzima bwabo cyangwa ibindi bikorwa byabo byafatwa nko kwigerezaho nko kunywa ibiyobyabwenge cyangwa kunywa inzoga zirengeje ibipimo byagaragajwe n’abahanga.

Nko ku bijyanye n’alcool aricyo kinyabutabire cy’ibanze mu ikorwa ry’inzoga z’ubwoko bwose, kuva ku zo bita byeri, kugera kuri za likeri ( spirit) unyuze kuri za divayi, umunyamakuru wa Virunga Today yagiye agaruka inkuru ku yindi ku ngaruka mbi zayo ku ngingo z’ingenzi z’umubiri wa muntu:umwijima, umutima, ubwonko n’ impyiko ndtese no muri rusange ku bice by’umubiri byose.

Virunga Today kandi uretse ibi bikorwa byo kuburira abasomyi n’abanyarwanda muri rusange, yanagaragaye ihangana n’abishoye mu bikorwa byo kwenga inzoga zitujuje ubuziranenge, zahawe izina ry’inzoga z’inkorano.

Ni igikorwa kitari cyoroshye na gato, kuko nk’uko twabigarutseho mu nkuru twakoze, iki cyari kimaze kuba icyorezo ku buryo n’inzego zegerejwe abaturage bisa naho ntacyo zari zitayeho ndetse bamwe mu bazigize bakomeje gutungwa agatoki ko bagira uruhare rutaziguye mu iyenga no mu icuruzwa ry’izi nzoga.

Virunga Today yahisemo kongera kubasangiza izi nkuru, kubera uruhare zishobora kongera kugira mu bukangurambaga, irishimira ibyemezo Ubuyobozi bw’igihugu bwafashe muri iki gihe bwo guhagarika burundu iyenga n’icuruzwa ry’ibinyobwa bitujuje ubuziranenge byari bimaze gushegesha ubuzima bw’abanyarwanda muri rusange n’ubw’urubyiruko ku bw’umwihariko.

Virunga Today kandi irizera ko inzego zibishinzwe zizakora ibishoboka kugira ngo ibihingwa byari bisanzwe byifashishwa ngo hengwe inzoga za gakondo, amasaka n’urutoki, haboneke uburyo bwizewe bwo kubitunganya kandi bworoheye igenzura bityo hategurwe ibinyobwa byiza byujuje ubuziranenge, biboneka mu buryo bworoshye kandi bibe bihendutse ku banyarwanda.

Dore rero urutonde rw’inkuru ziboneka muri archives za Virunga Today zaburiye abanywi b’inzoga cyangwa se izashyize ku karubanda ibikorwa binyuranije n’amategeko byo kwenga no gucuruza inzoga z’inkorano zangiza ubuzima bw’abaturage.

Kuburira

Ni izihe nzira alcool inyura ngo igere mu bice by’umubiri, ni izihe mpiduka ziba kuri iki kinyabutabire iyo kigeze mu mubiri

Umutwaro w’alcool ku mutima no ku mpyiko

Ingaruka z’alcool ku rwungano ngogozi

Ubwonko, urundi rugingo rw’umubiri wacu rwibasirwa bikomeye n’alcool

Dusobanukirwe na Alcohol poisoning: ihumanywa n’inzoga ku bazinywa ari nyinshi mu gihe gito

Alcool umwanzi no 1 w’umwijima

Guhangana

Amajyaruguru: Itangazamakuru ryiyemeje gutahiriza umugozi umwe ngo habonerwe umuti ibibazo bikomeje kugora ubuyobozi birimo urunguze n’ inzoga z’inkorano

Musanze-Muko: Virunga Today yatahuye uruganda ruto rw’inzoga z’inkorano hafi y’umuhanda wa kaburimbo, inzego z’ibanze zishyirwa mu majwi, abanywi bazo bo bemeza ko kuzihiga ari ukwikoza ubusa

Musanze-Muko: Buri munsi agemura ibijerikani 12 by’inzoga z’inkorano hirya no hino mu mujyi wa Musanze, ubuyobozi bw’inzego zibanze bukavuga ko bwabuze gihamya y’ibikorwa bye

Burera: Nta muti nyawo uraboneka ku kibazo cy’icuruzwa n’inyobwa by’ikiyobyabwenge cya Kanyanga

Amajyaruguru: Abayobozi b’inzego z’ibanze barashinjwa kugira akaboko mu kwenga no gucuruza inzoga z’inkorano.

Burera: Hari bamwe mu barimu bakomeje kugaragaraho imyitwarire mibi irimo ubusinzi n’ubwambuzi