Politike

Musanze-Cyuve: REG yijeje gukemura ikibazo cy’abatuye mu mudugudu w’icyitegererezo bamaze imyaka 2 mu icuraburindi

Urubuga ”Musanze & Customers’ rwakira rukanasubirizwaho ibibazo by’abafatabuguzi ba REG biganjemo abo mu karere ka Musanze rukomeje gukemurirwaho byinshi mu bibazo byari byarabaye agatereranzamba ku batuye umujyi wa Musanze no mu nkengero zawo.

Urugero  ni urw’ikibazo cyo kudahabwa amashanyarazi  giheruka kugaragazwa n’abatuye umudugudu wa Karunyura, akagari Kabeza, umurenge wa Cyuve, hanyuma Umuyobozi wa REG ishami rya Musanze akabaha icyizere cyo kuzabakemurira mu maguru mashya iki ikibazo bari bamaranye imyaka irenga ibiri.

Amarira y’abitabiriye gahunda y’akarere yo gutura mu midugudu none bakaba bamaze imyaka irenga 2 mu icuraburindi.

Nk’uko twabivuze haruguru iby’iki kibazo cy’abatuye muri site yo guturamo irimo gutunganywa mu mudugudu wa Karunyura, akagari ka Kabeza, umurenge wa Cyuve, cyagaragajwe n’umwe mu batuye uyu mudugudu wiyise Prisca,wabivuganye agahinda kenshi muri aya magambo.

Yagize ati:” Mwiriwe neza,  mbanje kubashimira rwose uru rubuga mwaduhaye biragara gara neza ko mushaka ko ibitagenda neza bizagenda neza . Muri urwo rwegorero njye nfite ikibazo cyumuriro mu kagari ka Kabeza umudugudu wa karunyura hariya hari site nshya iriguturwamo cyane. Dufite ikibazo cyumuriro ngo ntitwawubona kuko harimo metro zirenze ijana z’urutsinga twashatse no kuzigura izo zirenzeho ngo ntibyakunda tumaze umwaka urenga rwose mwadukorera ubuvugizi natwe tukabona umuriro tukava mumwijima gusa hashize igihe barashInze amapoto ariko twategereje insinga turaheba nukuri turababaye cyane mudutabare.”

Uyu Prisca yongeyeho ko kuri ubu yahisemo kwicecekera kubera kubura andi mahitamo. Prisca ati: ” Ingo pe turababaye rwose nashatse nubwansubiza muri Muhoza mbona bingoye mpitamo kwituriza mu mwijima.”

Mu kubasubiza Umuyobozi wa REG byumvikana ko aribwo bwa mbere yari amenye iki kibazo, kubera ari mushya yabashubije agira ati:”Mwazatugana tukababwira ibisabwa kugira ngo mubone amashanyarazi.Murakoze.”

Prisca wafashe iya mbere mu kugaragaza iki kibazo yahise amusubiza agira ati:” Twaraje munaradusura mutubwirako ibirenze metero 100 bitakunda ngo tugomba gutegereza igihe mwe muzashyiriramo uwanyu.”

Branch Manager mu gusubiza ati:’‘Gusa tuzagaruka ntacyo bitwaye’‘.

Twashatse kumenya aho Branch Manager ageze yubahiriza isezerano kuri aba baturage maze tubaza uwitwa Prisca niba hagati aho baba barakurikiranye iki kibazo maze asubiza agira ati:” Ndakeka hakiri kare kandi nitwe tugomba gufata iya mbere tukajya kwibera branch manager, kuri uyu wa mbere turajya kumwirebera, batubwiye ko uyu muyobozi ari umukozi, dufite icyizere ko ikibao cyacu kizakemuka.

Itangazamakuru rizashyirwa rimenye ibikubiye mu masezerano akarere kagiranye na Rwiyemezamirimo utunganya amasite

Ubwo iki kibazo cyatangwaga ku rubuga, bamwe mu bari kuri uru rubuga bagize icyo bakivugaho, bagaragaza ko ibikorwaremezo byagakwiye guhita bisangishwa abakimara gutuzwa mu mudugudu.

Uwiyise NB Theo nawe yamwunganiye agira ati: “Bibaye byiza umuriro ndetse n’amazi byagezwa muri site kuko byakorohera n’abarimo kubaka. Cyane ko hari n’amafaranga y’ibikorwaremezo bya site yagiye yishyurwa.’

Uwitwa Musengimana we, usanzwe ari n’umunyamakuru wa Virunga Today yunze mu rya mugenzi yibaza ku mitunganyirize ya za site zo mu karere ka Musanze. Yagize ati;”Ni gute se ahubwo site itangira guturwa itaragezwamo ibikorwa remezo! Reka turindire abayobozi bashya b’akarere iki kibazo cya site zisondekwa, nta muhanda wujuje ibisabwa, nta mazi, nta mashanyarazi, tuzacyitaho nk’itangazamakuru!”.

Si ubwa mbere kandi muri Virunga Today tunenga uburyo aya ma site yo mu karere ka Musanze atunganywamo kuko nk’uko twakomeje kubigaragaza uretse umuriro n’amazi kugeza ubu bitaragezwa muri aya masite kandi hashize hafi imyaka 4 uyu mushinga utangijwe, n’imihanda yakozwe muri zi site kugeza ubu ntabwo ari nyabagendwa ku buryo bigora abubaka muri izi site kugeza ibikoresho kuri za chantier, myinshi uri iyo ikba itagira imiyoboro y’amazi ndetsa ahandi ikaba yarasibye burundu.

Ubundi amabwiriza agenga itunganya ry’izi site aboneka mu byiswe Land Readjustement ( guhuza no gutunganya ubutaka binyuze mu bufatanye bw’abaturage). Bimwe mu bikubiye muri aya mabwiriza ni uko ibikorwaremezo bigomba kugezwa muri site nyuma y’uko igishushanyo cy’imikoreshereze y’ubutaka cya site ( Detailed Site Plan) cyemejwe n’inzego zibishinzwe, kandi bigakorwa mbere y’uko hatangwa ibyangombwa bishya by’ubutaka cyangwa impushya zo kubaka.

Haribazwa rero ukuntu Akarere ka Musanze kaba karahisemo gutanga impushya zo gutura muri izi site zitaragezwamo ibikowraremezo by’ingenzi, byongeye kandi yamara no kubikora ntiyihutire kubigezamo kuko nk’uko byavuzwe haruguru, imyaka ibiri irashize uriya mudugudu wa Cyuve, utangiye guturwa ariko na magingo aya nta muriro nta mazi aragezwamo.

Ibi nibyo bituma Itanaagzamkuru rikorera mu karere ka Musanze risanga ko byaba byiza ibikubiye mu masezerano akarere kagiranye na ba Rwiyemezamirimo bishyizwe ahagaragara kugira ngo hagaragazwe nyirabayazana y’ibibazo bikomeje kuvugwa muri izi sites.

Tubabwire ko kuri ubu mu karere ka Musanze harimo gutunganywa amasite yo guturwamo mu mirenge ya Musanze, uwa Kimonyo ndetse n’uwa Cyuve, bikaba byari byitezwe ko iri tunganywa ry’aya masite rizakemura burundu ibibazo cy’akajagari mu miturire byakomeje kurangwa mu mujyi wa Musanze.

Leave a Reply

Your email address will not be published. Required fields are marked *