Musanze- Cyabagarura: Benshi mu bashinjwaga korohereza abubaka mu kajagari bagizwe abere, hongera gushimwa ubwigenge bw’urwego rw’ubutabera
Iyi ni inkuru Virunga Today ikesha abakomeje gukurikirana iby’urubanza aba bayobozi bo mu nzego z’ibanze mu kagari ka Cyabagarura ho mu murenge wa Musanze bakurikiranwagaho icyaha cyo kwakira ruswa ngo hubakwe inyubako muri aka kagari mu buryo bw’akajagari.
Koko rero rugikubita abatawe muri yombi mu mpera z’umwaka ushize ( 12/11/2025) bakurikiranyweho kiriya cyaha bari bageze kuri 7: Gutifu na Sedo b’akagari, Dasso ku murenge wa Musanze, ba Gitifu b’imidugudu ya Kageyo Kiroba na Rugeyo n’umuturage umwe.
Nk’uko twabigejejeho mu nkuru yacu y’icyo gihe, RIB mu kubata muri yombi ikaba yari yagendeye ku makuru bariya ba mudugudu ubwabo bari bahaye Gitifu w’umurenge wa Musanze, amakuru ajyanye na ruswa baba barakiriye mu bihe bitandukanye, bakayigabana n’abayobozi mu kagari, ngo hubakwe inzu mu kajagari zidafitiwe impushya zo kubaka.
Ku italiki ya 08/12/2025, urukiko rw’ibanze rwa Muhoza rwafashe umwanzuro mu rubanza rw’ifunga n’ifungura kuri aba bakekwagaho icyaha, rwemeza ko aba bose bakomeza gufungwa, uretse Dasso, bituma aba boherezwa mu igorero rya Musanze aho bacumbikiwe bategereje iburanishwa mu mizi.
Kuwa 11/02/2026, urukiko rwisumbuye rwa Musanze, rwasomye imyanzuro kuri uru rubanza maze ruhanisha Gitifu w’akagari na Dasso imyaka 5 y’igifungo, mudugudu wa Kiroba ahanishwa igifungo cy’imyaka 2.5, bose uko ari 3 rumaze kubahamya icyaha cyo kwakira ruswa ngo hakorwe ibinyuranije n’itegeko.
Iyi myanzuro ntiyigeze yishimirwa na bariya bahamijwe icyaha bakaba barahise bajuririra iki cyemezo mu rukiko rukuru rwa Musanze.
Muri icyo gihe ariko Dasso wari wakatiwe kiriya gifungo ari hanze, nubwo itegeko ryamyemereraga kujurira akomeza kuba hanze, yahisemo kwerekeza iy’ubuhungiro magingo aya akaba atazwi aho aherereye.
Mu kwezi gushize kwa Gatanu, urukiko Rukuru rwa Musanze rwasomye uru rubanza mu bujurire, rugira umwere Gitifu ariko rugumishaho igihano cyo mu rukiko rwisumbuye kuri aba basigaye.
Ibi bivuze ko ku bantu 7 bavugwaga muri iyi dosiye, batanu bagizwe abere harimo na Gitifu w’akagari, benshi mu bakurikiraniye hafi iby’uru rubanza bakaba baremezaga ko bitazorohera Gitifu, kwikura mu nzara z’ubutabera.
Basubijwe mu nshingano naho Gitifu arimo gusaba akarere gusubizwa uburenganzira bwe
Ibi ni ibyemezwa n’abahaye amakuru Virunga Today, bayibwiye ko bitafashe igihe ngo aba bamaze amezi agera kuri ane mu igororero rya Musanze basubizwe mu nshingano zabo.
Umwe muri bo yagize ati:” Ntubona ko bariya bantu baziraga ubusa, ubutabera bwacu bwagaragaje ko budakorera mu kwaha kw’abayobozi, iriya raporo bavuze, yari iyo kubacisha umutwe, none dore urukiko rubagize abere, bahita basubizwa mu nshingano, Sedo yahise asubira akazi ako kanya kandi na ba mudugudu, mu nteko z’abaturage, twahise dutangarizwa ko bazakomeza inshingano zabo, twashimye Imana.”
Naho kuri Gitifu warekuwe mu kwezi gushize, imwe mu ncuti ze yabwiye umunyamakuru wa Virunga Today ko ntacyamubuza gusaba gusubizwa uburenganzira mu gihe yagizwe umwere n’ubutabera.
Yagize ati:” N’ubu twahoranye avuye ku karere gukurikirana icyo kibazo kandi ndumva kitagoranye na busa, keretse akarere gashaka kwishora mu manza kadashobora gutsinda naho ubundi ni urucabana, yarahohotewe, arabeshyerwa, ahubwo yakagombye guhabwa indishyi nuko ahari amategeko atabyemera…”
Tubabwire ko ingingo ya 67 y’itegeko rishyiraho stati rusange igenga abakozi ba Leta ivuga ku birebana n’uburyozwe bw’ikosa ryo mu rwego rw’akazi n’uburyozwe bw’icyaha, igira iti:
”Gukurikirana umukozi ku ikosa ryo mu rwego rw’akazi ntibibangamira uburyozwe bw’icyaha. Ikosa ryo mu rwego rw’akazi rishobora gutuma hatangizwa icyarimwe ikurikiranwa ku ikosa ryo mu rwego rw’akazi n’ikurikiranacyaha.
Iyo umukozi wa Leta akurikiranyweho icyaha gifitanye isano n’ikosa ryo mu rwego rw’akazi, urwego akorera rumukurikirana ku
ikosa ryo mu rwego rw’akazi rutabanje gutegereza ko ikurikiranacyaha rirangira.”
Ibi bivuze ko kuba Akarere ka Musanze karahisemo gusubiza mu kazi bariya bakozi bari bamaze kugirwa abere n’urukiko, nta yandi makosa kabona bakwiye gukurikiranwaho mu rwego rw’akazi, ibyongera gushimangira ko raporo yatanzwe n’umurenge ku myitwarire y’aba bayobozi nta shingiro yari ifite, ikaba yafatwa nka munyangire nk’uko byakomeje kwemezwa n’abarimo gitifu wagizwe umwere mu gihe cy’iburanisha.
Inkuru bifitanye isano: