Musanze-Gahondogo: Adasobanuye impamvu yishyuje amafranga ataragenywe na Ministere, atanabisabiye imbabazi, umuyobozi w’ikigo yahagaritse ibyo kwaka ababyeyi aya mfranga, Virunga Today ntiyanyurwa n’uburyo bw’ivunjisha yakoresheje ayasubiza

Kuri uyu wa kane taliki ya 10/09/2026, ku kigo cy’amashuri abanza cya Gahondogo, hateraniye inama y’ababyeyi barerera muri iki kigo, iyoborwa n’Umuyobozi w’Iki kigo. Ku murongo w’ibyigwa nk’uko twabitangrijwe n’Umubyeyi wari witabiriye iyi nama, hari ingingo imwe:  gukemura ibibazo byavutse hishyurwa amafranga y’ishuri mu itangira ry’uyu mwaka w’amashuri 2026-2027.

Abakurikiranira hafi ibibera mu karere ka Musanze mu bijyanye n’uburezi bo bemeza ko iyi nama itatunguranye kubera igitutu ibitangamazakuru Virunga Today na Kigalihit byakomeje gushyira kuri umuyobozi w’iki kigo, ngo avaneho icyemezo yafashe cyo kwishyuza amafranga ababyeyi, amafranga ataherewe uburenganzira kwishyuza n’inzego zibishinzwe nkuko amategeko abiteganya, ibyafatwa nk’ubujura bukorerwa ababyeyi.

Ababyeyi bazasubizwa amafranga yabo binyuze mu ivunjisha

Ibi nabyo ni ibyatangajwe n’uyu mubyeyi wari witabiriye iyi nama ku murongo wa telefone akaba yarabibwiye umunyamakuru wa Virunga Today  muri aya magambo: ” Nibyo, abari mu nama twatunguwe no kubwirwa n’umuyobozi w’ikigo ko amafranga ibihumbi bitanu twatanze tuzayaubizwa binyuze mu kuvunjisha, akazakoreshwa hishyurwa amafranga y’ifunguro mu gihembwe cya kabiri ndetse n’aganewe kugura impapuro, byose bizahwaniramo nk’uko yabitweretse.” 

Ku kibazo cyo kumenya niba uy muyobozi yababwiye impamvu yakoze aya makosa akishyuza amafaranga atemewe no kuba yenda yaba yabisabiye imbabazi, uyu muturage yamubwiye ko imvugo yakoreshjwe n’uyu muyobozi asobanura impamvu yatse aya mafranga atayumvise kandi ko atigeze yumava abisabira imbabazi.

Yagize ati:”Directeur yasobanuye ko impamvu hishyujwe ariya mafaranga byari mu rwego rwo kubukinga, nta bindi yongeyeho, twe ntabwo twashoboye gusobanukirwa icyo bishatse kuvuga, iby’imbabazi yaba yarasabye byo byo, urumva ko nabyo bidashoboka ku muyobozi.”

Tubabwire ko ijambo ” booking’ ryo mu rurimi rw’icyongereza uyu muyobozi yakoresheje,  risobanura gukoresha reservation, kubikira umuntu servise ahantu, ibi bishatse kuvuga ko uyu muyobozi yakiraga aya mafranga ku baje kwiyandikisha kugira ngo abafatire imyanya, hato itajya gushyira bagacikanwa, hanyuma bakazayasubziwa cyangwa akavunjwamo izindi service nk’uko yabigenje hano.

Ibyatwawe mu bujura bigomba  guhita bisubizwa bene byo

Ibyo kuba directeur yemeza ko ibyakozwe ari booking byafatwa nk’amatakirangoyi kuko n’iyi booking ntaho ivugwa mu mabwiriza ya ministre w’uburezi kandi nta n’igisobanuro iyi booking yahabwa mu bijyanye n’amashuri kuko imyanya ihari iratangwa, yarangira ugahagarika igikorwa cyo kwakira abana, ntabwo ari nko mu mahoteli haba hari igikorwa cyo gucurana imyanya.

Iby’iri vunjisha ryakozwe naryo ntawarishyira amakenga kuko ubu buyobozi bushobora kuzibagiza, bukazaca murihumye aba babyeyi, bukongera kubishyuza ziriya mpapuro. Icyagakozwe cyonyine  nuko ubuyobozi bw’ikigo bwakwemera amakosa yakozwe, bukabisabira n’imbabazi, amafranga yakiriwe mu buryo butemewe n’amategeko agasubizwa bene yo kuko n’ubundi, iyo hatahuwe igikorwa cy’ubujura, umujura agafatirwa mu cyuho, igikorwa cy’ibanze ni ugusubiza abibwe ibyabo.

Naho ku bijyanye n’izi mpapuro, nk’uko twabivuze mu nkuru z’ibanza, benshi mu bayobozi b’ibigo, bazituma ababyeyi, bikarangira zisubijwe ku isoko n’aba bayobozi mu bikorwa by’ubujura baba bakomeje gushyira imbere,  nk’uko byakomeje kugenda ku bikoresho byifashishwa  mu isuku birimo za raclette zitumwa buri mwana kandi ikigo kiba kizikeneye ku mubare muto.

Tubabwire kandi ko ministre w’uburezi aheruka gutangaza ko amafranga ya captation grant ibigo bihabwa ngo akoreshwe mu mirimo itandukanye, azazamurwaho 65% , aya mafranga bikaba byitezwe ko azaziba icyuho, ababyeyi ntibakomeze gusabwa amafranga arimo nk’ayo yo kugura impapuro.

Virunga Today iracyategereje ko n’abandi bayobozi bavuzwe muri bene ibi bikorwa by’ubujura  bakwibwiriza bagasubiza ababyeyi amafranga bakiriye batabifitiye uburenganzira,  atari ibyo  Virunga Today izahitamo gusaba inzego bireba guha abahohotewe ubutabera ndetse n’abo babyishoyemo babe babiryozwa.