Rc-Musanze: Hamenyekanye amakuru mashya ku bayobozi b’ibigo baherutse kugororerwa ibigo byiza

Ubuyobozi bwa Virunga Today bwahisemo guha agaciro gakomeye ibivugirwa mu kiganiro umuti ukwiye gihitishwa kuri Radiyo y’abaturage ya Musanze kuko bubona ko iki kiganiro ari isoko y’amakuru menshi agaragaza ibibazo abaturage bakomeje guhura nabyo, service mbi bakomeje guhabwa nyamara baba bafite imigambi myiza yo kwiteza imbere. Virunga ikaba izakomeza kuba indanguramajwi, station relay y’iki kiganiro kimaze kuba kimenyabose mu ntara y’amajyaruguru.

Nk’ubwo uyu munsi kuwa 20/03/2026, abateguye iki kiganiro bibanze ku mikorere mibi ikomeje kuranga abayobozi b’ibigo by’amashuri, abayobozi bakirangwa n’ihohotera bakorera abo bashinzwe kwitaho, birengagije uburenganzira bemererwa n’amategeko, amategeko afasha kugera ku ireme ry’uburezi.

Aha niho bamwe mu bakurikira iki kiganiro bahereye bagaragaza ibyaranze imiyoborere ya bamwe mu bayobozi b’ibigo bo mu karere ka Musanze baherutse guhindururirwa ibigo, imiyoborere umuntu atatinya kuvuga ko yari iy’igitugu.

Uwahoze ari umuyobozi wa GS Muhe wagororewe kuyobora GS Kampanga yaragiye impundu ziravuga

Iby’izi mpundu zavugijwe Virunga Today yigeze gukomozaho mu nkuru iheruka, ninazo zavuzweho n’umuntu wohereje ubutumwa bugufi mu kiganiro umuti ukwiye, avuga ku miyoborere mibi yaranze uwahoze ayobora GS Muhe, ubu wimuriwe muri GS Kampanga benshi bemeza ko muri icyo gihe yazamuwe mu ntera kubwra amazina atandukanye y’ibi bigo.

Yagize ati: Uyu muyobozi wahoze ku kigo cya Muhe, ntawe utaramutinyaga, nta munyeshuri wakandagiraga mu ishuri atabanje kwishyura amafranga yose abareyemo ikigo, yaba ay’amafunguro cyangwa andi yakaga uko yishakiye, buno bamwimuriye ku kigo cya Kampanga, yaragiye abantu bose barabyina.”

Uwahoze ayobora Kampanga nawe, nta munyeshuri wakandagiraga mu ishuri atabanje kwishyura aya coaching.

Aya ni amakuru nayo yatanzwe n’uwohereje ubutumwa muri iki kiganiro, wagaragaje ko amahano yakozwe n’umuyobozi w’ikigo cy’amashuri mu karere ka Burera wavuzwe muri iki kiganiro, wavukije abana gukora ibizamini, abaziza kutishyura coaching, ari nayo yakomeje gukorwa mu bihe binyuranye n’uwari umuyobozi wa Gs Kampanga, kuri ubu wagororewe kuyobora ikigo cyiyubashye gicumbikira abanyeshuricya ESSA Ruhengeri.
Yagize ati : Natwe hano mu murenge wa Kinigi, umuyobozi w’ikigo cya Kampanga nta mikino yabagamo,niyo waba uri nde, nta munyeshuri washoboraga kwinjira mu masomo atabanje kwishyura aya coaching, ni ibintu byari bizwi mu karere hose.”

Tubabwire ko bamwe mu baganiriye na Virunga Today, nyuma y’iyimurwa rya bamwe mu bayobozi b’ibigo by’amashuri, bayibwiye ko iri yimurwa ritakozwe mu mucyo kandi hari inyungu zindi zishobora kuba zihishe inyuma y’iri yimurwa, inyungu za bamwe mu bashinzwe uburezi mu nzego zinyuranye mu karere, iki kikaba ari igisobanuro gishobora gutangwa kuri aba bayobozi bagaragajwe muri iki kiganiro nyamara batarigeze barangwa n’imiyoborere myiza.

Virunga Today irongera kwibutsa, ababyeyi, abarezi ndetse n’abanyeshuri, ko bahawe rugari muri iki kinyamakuru gihora gikanuye mu bijyanye n’ibibazo birebana n’uburezi, kikaba cyiteguye kwakira no gutangaza amakuru yose y’aho babona hari ibibazo mu burezi.

Mu gihe cya vuba ikazabagezaho imiyoboro yo kwifashisha mutugezaho ibyo mubona bitagenda neza bikeneye gukosorwa.