Breaking news-dosiye ruswa abayobozi ba Cyabagarura: Gitifu na Dasso bakatiwe imyaka 5 y’igifungo, mudugudu Aisha imyaka 2, abasigaye bagirwa abere

Ibi bihano bikubiye mu mwanzuro wasomwe kuri uyu wa 25/02/2026 mu rukiko rwisumbuye rwa Musanze   mu rubanza rwaburanishije  rwaregwagamo abayobozi b’inzego z’ibanze bo mu kagari ka Cyabagarura, umurenge wa Musanze, bari bakurikiranyweho icyaha cyo  kwakira ruswa ngo hubakwe inzu mu kajagari zitatangiwe uruhushya mu midugudu inyuranye yo muri aka kagari ka Cyabagarura.

Amakuru dukesha bamwe mubakomeje gukurikiranira hafi iby’uru rubanza, aremeza ko urukiko rwakatiye uwari Gitifu w’akagari ka Cyabagarura ndetse na Dasso  mu murenge wa Musanze, igifungo cy’imyaka 5 naho umukuru w’umudugudu wa Kiroba Madame Aisha ahanishwa igifungo cy’imyaka 2, rumaze kubahamya ubufatanya cyaha mu kwakira ruswa.  Abandi basigaye barimo, ushinzwe  iterambere mu kagari , abakuru b’imidugudu 2, ushinzwe umutekano ndetse n’umuturage,  urukiko rwisumbuye rwabagize abere bahita bafungurwa.

Tubabwire ko mu iburana ku ifunga n’ifungurwa ry’agateganyo ryabereye mu rukiko rw’ibanze rwa Muhoza, umucamanza yari yemeje ko nta mpamvu yabonaga zatuma uyu mukozi w’urwego rw’umutekano, Dasso yaburana afunze.

Ingingo ya 186 y’itegeko no 027/2019 ryo kuwa 19/09/2029 ryerekeye  imiburanishirize y’imanza z’inshinjabyaha iteganya ko iyo uregwa aburana adafunze,  agakatirwa igihano cy’igifungo, akomeza kuburana adafunze iyo yajuririye icyo cyemezo.  Icyokora nanone ngo urukiko rushobora gutegeka ko uwakatiwe waburanye adafunze ahita afatwa agafungwa iyo ubushinjacyaha bwabitangiye impamvu zumvikana kandi ababuranyi barazigiyeho impaka.

Inkuru bifitanye isano:

Dosiye ya Ruswa -Cyabagarura: Urukiko rwemeje ko nta mpamvu zikomeye zatuma Dasso aburana afunze.