Bakangishije Virunga Today umuvumo, ibasaba kutivanga mu mikorere y’ikinyamakuru cyiziritseho igisasu, kigashyira imbere ubuvugizi ku bibazo byugarije umuturage

Kuri uyu wa gatatu taliki ya 13/05/2026, imyaka 2, umunsi ku wundi yari irangiye icyahawe izina  ry’ikinyamakuru Virunga Today gitangiye gushyira mu ngiro intego cyari cyahawe cyo gutangaza inkuru ziganjemo iz’ubuvugizi ku bibazo binyuranye bikibangamiye iterambere ry’abanyarwanda ndetse no kugeza ku basomyi bumwe mu bumenyi bw’ingenzi mu bijyanye n’imibereho yabo harimo uburyo bwo kwirinda indwara cyangwa ibiza.

Ni muri iki gitondo cy’iyi anniversaire kandi muri Virunga Today hakiriwe ubutumwa bw’umuturage utuye mu murenge wa Gataraga ubutumwa bwagarutse ku karengane akomeje kugirirwa n’abavandimwe be, yakwitabaza inzego zirimo iz’umurenge, ntizimurebe n’irihumye, inzira rukumbi bari bamurangiye akaba ari iyo kwitabaza ubuvugizi bwa Virunga Today.

Iyi anniverasire kandi yabaye hari ibibazo bikomeye byari bikiri mu bubiko bwa Virunga Today, bikaba byari birimo gukurikiranwa harimo icy’abaturage bakoresha umuhanda Musanze-Butaro bataramenyea impamvu bazamuriwe igiciro cy’urugendo  ndetse n’icya service mbi zikomeje gutangwa n’abaheshabinkiko.

Ni anniversaire rero isanze ikinyamakuru Virunga Today kimaze gutera intambwe ishimishije muri uyu murongo yihaye kuko nk’uko bigaragaragara muri mubazi y’ikinyamakuru, hamaze gukorwa inkuru 461 nyinshi zari iz’ubuvugizi ku bibazo byiganjemo urunguze, imikorere y’abaheshabinkiko, inzoga z’inkorano, ibibazo byo mu nzego z’ibanze n’ibindi. Virunga Today kandi yagarutse ku nkuru z’ubumenyi ziganjemo izivuga ku miterere y’indwara zinyuranye n’uburyo bwo kuzirinda, amakuru ku bumenyi bunyuranye buboneka mu Isi ya none n’ibindi.

Ni akazi gakomeye kakozwe kandi mu buryo bugoranye kuko magingo aya hari byinshi bikibura ngo Virunga Today ishobore gukora mu buryo bwifuzwa bwa kinyamwuga ariko hari icyizere ko byose bizagenda bikemuka kubera umuhati w’ubuyobozi ndetse n’akanyabugabo abakunzi bayo badasiba kuyitera.

90%  by’ubuvugizi bwa Virunga Today ntacyo bwagezeho ariko magingo aya ibuye ryishe isuka ryaramenyekanye

Uku ni ukuri kwigaragaragaza urebye idosiye zose zaciye mu biganza bya Virunga Today. Koko rero nko ku bibazo by’urunguze byafashe umwanya munini mu nkuru zayo, ibibazo byakomeje kuyogoza imirenge myinshi y’akarere ka Musanze, inkuru zakozwe zashyize ahagaragara ubujura bukomeye bukorwa n’amatsinda anyuranye yakomeje gukorera muri iriya mirenge, kuri ubu abagize aya matsinda bakaba bazwi dore ko iki kibazo cyari gisanzwe kinakurikiranwa na bagenzi bacu bo muri Karibu Media.

Virunga Today kandi yakomeje gukurikirana mu buryo bw’umwihariko ibibazo byari yagejejweho n’abantu ku giti cyabo, benshi muri bo bakaba barabonye ubutabera abandi bakaba bari hafi yo kubuhabwa.

Gusa ikibabaje nuko nubwo inzego z’ibanze zakomeje guhabwa amakuru kuri iki kibazo, kugeza ubu nta ngamba zifatika iki kibazo kirafatirwa nk’uko byagenze ku nzoga z’inkorano, aba batanga urunguze bakaba bakomeje gukorera mu bwihisho ari nako bashaka amayere mashya aborohereza muri ubu bucuruzi butemewe.

Mu bundi buvugizi bwakubise igihwereye, twavuga ubwakorewe abimuwe mu nkengero za pariki y’ibirunga, kugeza ubu ibibazo byabo byimwe amatwi kandi nk’uko babigaragarije Virunga Today, hari ukuntu ibibazo byabo byagakemutse kuko hari inzira zinyuranye zihari zakura aba bavandimwe mu buzima bubi bakomeje kubamo.

Muri make nubwo akazi kakozwe muri iyi myaka 2 bisa naho nta musaruro ugaragara katanze, ariko nibura habonetse umuyoboro wizewe wo mu itangazamakuru unyuzwamo ibibazo bitabura abaturage bahura nabyo. Ikindi kitabura kwishimirwa nuko byinshi muri ibi bibazo, ubuyobozi bw’uturere butari bubizi cyangwa ngo bumenye uburemere bwabyo, hakaba hizewe ko igihe kizagera hagafatawa ingamba zo kubirangiza.

Bakangishije umuvumo Virunga Today kubera yatinyutse ibyo benshi batinya kuvuga mu itangazamakuru

Bimwe mubitarakomeje kuvugwaho rumwe n’abasoma inkuru za Virunga Today ni ibikubiye mu nkuru zimwe ibategurira zivuga ku bihayimana hakaba hari abagiye babona ko umunyamakuru yaba yararenze akarimbi ( umugani w’abarundi) akibasira igice byari bisanzwe bizwi ko gitinyitse, kukivugaho bikaba bishobora gukururira umunyamakuru umuvumo,  cyane ko hambere aha byari bizwi ko abanyamadini bafite ububasha bwo kuvumana, uvumwe akaba yapfa nabi cyangwa agahura n’andi makuba anyuranye.

Abandi bo ariko bagaragaje ko ari intambwe nziza iki kinyamakuru giteye,  kuri ubu kikaba gishobora gushyira ahagaragara amakosa ya bamwe mu banyamadini bityo bigatuma abaturage bamenya ibibazo biri mu nzego z’iyobokamana. Aba bongeyeho ko imikorere itinya kuvuga ku banyamadini idindiza ubwisanzure bw’itangamakuru, kuko muri icyo gihe ritabasha gukora nk’ijwi ry’abaturage mu kugaragaza ibitagenda.

Aba ba nyuma ndetse nibo bafashe iya mbere batangira guha amakuru y’ingenzi ku bibera mu madini atandukanye akorera hirya no hino mu Ntara y’amajyaruguru menshi muri aya makuru akaba avuga ku bujura bukomeje kubera muri aya madini, Virunga Today ifatanije n’ibindi binyamakuru bikorera mu Ntara bakaba bakomeje gusesengura ukuri kw’amakuru yatanzwe, igihe nikigera akazatangarizwa abaturage hisunzwe amabwiriza agenga itangazamakuru mu Rwanda.

Kuri aba bakomeje gukangisha Virunga Today umuvumo, igisubizo nuko na mbere yuko Virunga Today itangira  gutambutsa inkuru, abayishinze bari bazi neza ko biziritseho igisasu, ko uko byagenda kose, ingorane zikomeye zitabura.  Icyangombwa rero akaba  ari ugushyiraho ingamba zo kwinjira mu kibazo cyagaragajwe  no kugishakira umuti  hanyuma n’abo bireba bakamenya ko ibihe byahindutse, ko ikibazo cy’imiyoborere myiza nabo kibareba akaba ari ngombwa ko bubahiriza amategeko bishyiriyeho umukono bityo bagacunga  neza imitungo ya rubanda bareberera.

Tubabwire ko ubushakashatsi bwagaragaje ko itangazamakuru rishobora gufasha mu gikorwa cyo kurinda ubujura mu madini igihe rikora inkuru zicukumbuye zituma abayobozi b’amadini batinya gukora amakosa.Izi nkuru kandi zakongera icyizere mu bayoboke bakumva  ko ari uburenganzira bwabo kumenya ukuri mu mikorere y’amadini yabo. Ibi kandi ngo byafasha gukemura amakimbirane mu buryo bwubaka, aho guceceka ibintu byateza ibibazo bikomeye.