Gakenke: Akarere kagejejweho amahamagara, hongera kugaragara ubuswa bukabije mu icungwa rya dosiye ya mwarimu wahanaguweho icyaha cy’ubujura

Inkuru y’uko ku karere ka Gakenke haba haragejejwe amahamagara avuye ku rukiko rwisumbuye rwa Musanze,  Virunga Today iyakesha umwe mu bakozi bo mu karere Gakenke, ku murongo wa telephone akaba yarabibwiye umunyamakuru wa Virunga Today muri aya magambo:

“Ni byo koko icyumweru kirashyize tumenye ko hari umuheshawinkiko wazanye amahamagara ku karere,assignation, ni amahamagara yavuye mu rukiko rwisumbuye rwa Musanze kandi ntakubwiye byinshi, aya mahamagara afitanye isano na za rwaserera z’abarimu zakunze kuvugwa muri akarere, akarere barakareze da!”

Umunyamakuru utarashatse guhatiriza ngo abaze byinshi uyu mukozi yahise akubita agatima ku madosiye atabarika yakunze kwandikaho y’ihohotera ryagiye rikorerwa abarimu, arko bagakomeza gushinyiriza, maze amahirwe menshi ayerekeza ku bibazo byakomeje kuvugwa ku kigo cya Munyana giherereye mu murenge wa Minaxi cyaranzweho ibibazo bikomeye maze benshi mubayobozi kuri iki kigo  bakangazwa kandi bamwe muribo bazira ubusa.

Uyu munyamakuru kandi yakekereje no  dosiye ya mwarimu Uwazigira  Marcel Clement  waketsweho ubujura akaza kugirwa umwere ariko akarere kakamugumishirizaho ibihano ku mpamvu n’ubu zitaramenyekana.

Urujijo ku mabaruwa 2 Meya aheruka kwandika ajyanye na dosiye ya mwarimu uheruka kugirwa umwere ku cyaha cy’ubujura

Uru rujijo rwavuutse nyuma yaho ikinyamakuru indorerwamo gishyiriye ahagarara aya mabaruwa mu nkuru yacyo ifite umutwe ugira uti:” Gakenke: Umwarimu yahejejwe mu gihirahiro n’Akarere yimwa imishara ye n’akazi nyuma yo kuba umwere kubyo ya cyekwagaho.“.

Muri iyi nkuru ye, umunyamakuru yavuye imuzi ikibazo cy’umwarimu uwitwa Uwazigira Marcel  Clement yahuye nacyo ubwo akarere ka Gakenke  kamuhagarikaga mu kazi kugira ngo hakorwe iperereza ku cyaha cy’ubujura yakekwagaho, kamusezeranya ariko kuzamusubiza imishara ye igihe yaramuka agizwe umwere.

Ntabwo ari uko byajye kugenda kuko nyuma yaho urukiko rw’ibanze rwa Gakenke rumugiriye umwere, akarere kisubiyeho maze aho kumusubiza uburenganzira, gatangiza izindi nzira zidasobanutse zo kumukurikiranaho icyaha yagizweho umwere kandi byemezwaga ko cyabereye hanze y’ikigo.

Ni ku bw’ibyo muri iyi nkuru ye, uyu munyamakuru agaragaza ibaruwa yandikiwe uriya mwarimu imusaba kwisobanura ku ikosa Meya we yemeza ko ryakorewe mu kagari ka Buheta, umurenge wa Gakenke.

Meya Mukandayisenga akomoza ku hakorewe iri kosa yagize ati:” Nshingiye kuri raporo uo kuwa 15/07/2026, umunyamabanga Nshingwabikorwa w’akagari ka Buheta yandikiye Umuyobozi w’akarere ka Gakenke igaruka ku bujura bw’amatungo wari ukurikiranyweho, nkwandikiye ngira ngo ngusabe ibisobanuro ku mpamvu ukekwaho ubujura no kurangwa n’imyitwarire itabereye umukozi wa Leta.”

Byumvikane ko amakosa uyu mwarimu yasabwaga gutangaho ibisobanuro ari ayari yakorewe mu kagari ka Buheta umurenge wa Gakenke, ari naho havuye iyi raporo Meya yashingiyeho.

Uyu munyamakuru kandi yongera kugaragaza indi baruwa Meya  yandikiye perezidante w’akanama gashinzwe gukurikirana amakosa yo mu rwego rw’akazi ku kigo cya Gs Murambo,  amusaba kumugezaho raporo ku makosa yaba yarakozwe na mwarimu Clement, ni nyuma yuko akarere katanyuzwe n’ibisobanuro byatanzwe n’uyu mwarimu.

Meya asoza ibaruwa ye kandi nabwo akomoza kuhakorewe aya makosa yagize ati:” Nkwandikiye ngusaba gukora iperereza ku makosa yavuzwe haruguru Bwana Uwazigira Marcel Clement akurikiranyweho ku kigo cya GS  Murambo.”

Aha naho imvugo yakoreshejwe na Meya yumvikana neza, ni amakosa akurikinyweho ku kigo cya Gs Murambo giherereye mu kagari ka Kidomo umurenge wa Kamubuga.

Aha niho rero havuka urujijo, abantu bakibaza ukuntu haba harabayeho kwibeshya kuri Meya, icyaha cyakorewe mu murenge wa Gakenke akemeza ko cyakorewe mu wundi murenge bidahana n’imbibi wa Kamubuga.

Ibyo kuba ari makosa mashya yaba yarakozwe na mwarimu Clement nyuma yaho agiriwe umwere,  nabyo sibyo, kuko mu ibaruwa ye Meya yandikiye perezidante wa kariya kanama,  ahera ku bikubiye mu ibaruwa yanditswe na Clement atanga ibisobnauro ku makosa yari yakorewe mu murenge wa Gakenke.

Magingo aya hategerjwe ko hasohoka iyi raporo yasabwe n’Umuyobozi w’akarere, ibizaba bikubiye muri iyi raporo akaba ari nabyo nanone Umuyobozi w’akarere azaheraho afatira ibindi byemezo uyu mwarimu, ni ukuvuga kumugenera igihano hakurikijwe uburemere bw’amakosa azaba yahamijwe cyangwa kumugira umwere agasubizwa uburenganzira bwe. Ni ikibazo Virunga Today izakomeza kubakurikiranira

 

Akarere kasabye umwarimu kwisobanura ku makosa akekwaho yaba yarakoreye mu kagari ka Buheta umurenge wa Gakenke, katanyuzwe, gasaba akanama gashinzwe gukurikirana amakosa yo mu rwego rw’akazi ko ku kigo cya GS Murambo gukora raporo y’amakosa uyu mwarimu yaba yarakoreye kuri iki kigo giherereye mu kagari ka Kidomo umurenge wa Kamubuga.