Musanze-Rwaza: Hagaragajwe akarengane kakorewe abaturage kugeza naho hari abatakaje ubuzima abandi bashyirwa mu manegeka na Rwiyemazamirimo, Visi Meya yumvikana ashimira umunyamakuru wa Isango star wamuhaye aya makuru

Bizimana Emmanuel ni umunyamakuru wa Isango Star ukunze kwandika inkuru ziva imuzi ibibazo byugarije abatuye intara y’Amajyaruguru harimo n’iby’akarengane gakomeje gukorerwa aba baturage, abakagombye kubarenganura bakabigendamo biguru ntege.

Iyo uyu munyamakuru aheruka gukora ni iy’akarengane kokorewe abaturage bo mu murenge wa Rwaza, aho Rwiyemezamirimo yafashe ku ngufu ubutaka bwabo, bikarangira inyubako zabo zari hafi y’ubu butaka zishyizwe mu manegeka, igiteye ubwoba kurushaho, nuko ibi bikorwa by’uyu Rwiyemezamirimo bimaze guhitana ubuzima bw’abaturage, batari bafite aho bahuriye n’ibi bikorwa kuko batari abakozi ba company.

Umunyamakuru wa Virunga Today ari mu bakurikiye iyi nkuru maze ahitamo kuyisangiza uko yakabaye abasomyi ba Virunga Today amaze kuyikoraho ubusesenguzi.

Barashinja ubuyobozi kurebera ibikorwa bitemewe bya Rwiyemezamirimo bimaze kubicamo 4

Umunyamakuru atangira inkuru ye agaragaza ubu butaka Rwiyemezamirimo yigabije,bukaba buherereye mu mu mudugudu wa Bukoro, ,akagari ka Nyarubuye, akaba ari na hafi y’ibiro by’umurenge wa Rwaza.

Ubutaka ubwabwo bukaba bugizwe n’umusozi, bigaragara ko 1/2 cyawo cyarangije gukurwaho, mu gice gisigaye ahagana hejuru, hakaba hagaragara umurima w’urutoki wazanywe n’inkangu.

Inkuru nyirizina yumvikanamo ubuhamya bwabahuye n’iri hohoterwa bakorewwe n’uyu Rwiyemezamirimo, bagakomeza bemeza ko ntacyo ubuyobozi bw’Akarere bwakoze ngo barenganurwe kandi nyamara ibi bikorwa bitemewe bimaze guhitana abantu bane basanzwe badafite aho bahurira n’imurimo ikorerwa muri iyi kariyeri.

Uwa mbere yatangiye abwira umunyamakuru uburyo Rwiyemezamirimo yarwaye ubutaka bwe nta bwumvikane bubanje kubaho!

Yagize ati:” Baraje muri iryo joro baravuga bati nutemera amafranga bari kuguha miliyoni 2 n’igice, bati buraca mu gitondo imashini twayigejejemo kuko njye byafashe ruguru y’inzu.”

Uwakabiri we yasobanuriye umunyamakuru ukuntu we n’umuryango we bashyizwe mu manegeka na Rwiyemezamirimo.

Yabivuze muri aya magambo:“None njye nari ntuye ruguru yabo nzi ko batazatugeraho nagiye kubona ibyo bintu bimaze kumanuka, mbona n’iwanjye hasadutsemo kabiri harashyira.

Uwa gatatu we yagaragarije umunyamakuru amayere akoreshwa na Rwiyemezamirimo, ingaruka zirimo imfu z’abaturage, anagaragaza ukuntu ubuyobozi bw’akarere bwavuniye ibiti mu matwi, ntibwumve akarengane kabo.

Yagize ati: “Babona ubutaka bwacu bwamanutse, bakatuzanaho iterabwoba kuko babona bwatangiye kumanuka ….Mbere yuko ibi biba ( imashini yica umuntu) twari twabuze abandi bantu bagera kuri batatu, bahitanywe nabo n’iki kinombe kandi ubuyobozi nta kintu bwari bwaradufashije.”

Ubuyobozi bw’umurenge bwatesheje agaciro ubutaka bwabo

Aba baturage bakomeje kugaragariza umunyamakuru akarengane bakorewe bushinja Gitifu w’umurenge gutesha agaciro no kugira inyungu mu ihohoterwa bakomeje gukorerwa.

Umwe muri aba baturage akomoza kuri iyo myitwarire idahwitse ya Gitifu yagize ati:” Impamvu navuga ko Gitifu afitemo inyungu ni iyi: Ubwo Gitifu yaraje aratubaza ngo mbe weho baguha angahe ?

MUSANZE: Mu murenge wa Rwaza, Rwiyemezamirimo yigabije umutungo wa Rubanda_ rugufi