Paruwase Katedrale Ruhengeri: Igitaramo cya Korali Magnificat cyari mu rwego ruciriritse, biha umukoro ubuyobozi bwa Paruwase Katedrale ya Ruhengeri
Igitaramo cyiswe “Dutetere Umubyeyi” ni igitaramo cya Korali Magnificat ikorera ubutumwa kuri Paruwase Katedrale cyahimbajwe kuri iki cyumweru taliki ya 09/08/2026, mu nzu mberabyombi ya Centre Pastorale iherereye hafi na Paruwase Katedrale ya Ruhengeri maze cyitabirwa n’abarimo Nyiricyubahiro Mgr Visenti Harolimana, Umushumba wa Diyoseze Gatolika ya Ruhengeri. Ni igitaramo iyi Korali yateguye ngo yinjize abakristu mu munsi Mukuru w’Ijyanwa mu ijuru rya Bikiramariya uzahimbazwa kuri uyu wa 15/08/2026.
Umunyamakuru wa Virunga Today utarabonye akanya ko kwitabira iki gitaramo, yahisemo gukurikirana uko iki gitaramo cyagenze yifashishije umuyoboro wa Youtube wahitishijweho iki gitaramo uko cyakabaye maze yibonera ko hari inenge zikomeye zaranze iki gitaramo nubwo bigaragara ko hari intambwe igenda iterwa n’iyi Korali mu rwego rwo kwiyubaka no kunoza imiririmbire yayo.
Ni igitaramo ubona rero ko cyari mu rwego ruciriritse ugereranije n’ibitaramo bisanzwe bihimbazwa n’andi makorali akorera ubutumwa kuri Paruwase Katedrale ya Ruhengeri ariyo Korali Ishema Ryacu na Korali Mwamikazi wa Fatima nk’uko tubigaragaza muri iyi nkuru kandi nyamara iyi Korali yari ihaye igihe gihagije, kinini cy’imyiteguro, hafi amezi 6.
Ubwitabire bwo hasi, umuteguro udashamaje
Iby’uko iki gitaramo cyashoboraga kwitabirwa n’abantu mbarwa ugereranije n’abitabira ibitaramo by’Ishema cyangwa ibya Mwamikazi byatanze icyezezi ubwo byamenyekanaga ko umunsi w’iki gitaramo uzaba mu cyumweru gipanzemo gahunda nyinshi z’ubukwe harimo ubwo gushyingirwa busanzwe buba buri wa 6 ariko cyane itangwa ry’isaktramentu ry’ugukomezwa mu gitambo cya Misa ku Ngoro ya Bikiramariya hakomezwa abarenga 500.
Bivuze ko umubare munini w’abakristu bagombaga guhitamo kwitabira ubukwe bw’incuti, abavandimwe, abaturanyi se bari bafite ibirori aho kwitabira igitaramo byari bizwi ko kwinjira ari ubuntu. Niko byagenze rero salle ubwayo ntiyarimo n’abagera ku ijana mu gihe isanzwe yakira abagera kuri 300.
Ikindi cyigaragaje nk’ikinyuranyo ugereranije n’ibindi bitaramo twavuze haruguru, ni umuteguro udashamaje wagaragariye abari bitabiriye igitaramo. Umubare w’abaririmbyi ubwawo wari uri hasi ( hafi 25 mu gihe muri Mwamikazi baba bagera ku 100), nta sonorisation igezweho yakoreshejwe ( muri biriya bitaramo twavuze hakoreshwa iya TOP 5 SAI Ltd, iri muzigezweho mu mujyi wa Musanze), ndetse n’umucuranzi yagaragaye ari umwe acuranga inanga isanzwe, mu gihe mu bitaramo twavuze haruguru haba hari itsinda rikomeye kandi rinini ry’abacuranzi n’abatekinisiye batuma igitaramo kirushaho kuryohera abacitabiriye.
Iki kibazo cy’abatekinisiye ubanza ari nacyo cyaje gutera ibibazo, hakavuka ikibazo mu majwi yanyuzwaga kuri Youtube, ntiyumvikane neza, ntihagira numwe urabukwa ngo akemure ikibazo.
MC udashoboye
Iby’uyu Mc udashoboye byo byagaragariye buri wese, hibazwa ukuntu umuntu nk’uriya atoranywa ngo ayobore imihango nk’iriya iba yatimiwemo abanyacyubahiro banyuranye barimo n’Umwepikopi, Umushumba wa Diyoseze . Intege n’ubunararibonye bwa ntabwo bw’uyu wayoboye iki gitaramo byigaragaje mu mvugo yakoresheje zidakwiye zitajyanye n’ibirori nka biriya, umuntu atatinya kuvuga ko ari imvugo nyandagazi ndetse no k’ukuntu yayoboye ibi birori muri rusange.
Iki kibazo cya ba Mc badashoboye bahabwa kuyobora ibi bitaramo by’amakorali, twari twanagikomojeho mu nkuru twakoze ku gitaramo Christmas Carols Concert giheruka, tugaragaza ko Mc wacyo nawe atari mu rugero kiriya gitaramo cyari kirimo, hakaba hibazwa impamvu rero korali zikomeje guha agaciro gake uyu murimo mu bisanzwe w’ingenzi mu birori.
Tubabwire kandi ko uretse n’iki kibazo cya Mc udashoboye, n’uwahawe ijambo ngo avuge mu izina rya Korali atabyitwayemo neza. Mu imbwirwaruhame ye, yagaragaye bimugora gusoma ibyo ahari atiteguriye ( kubera ahari ikibazo cy’amaso), no gukoresha inyito zitajyanye nk’aho yise Mgr Nyakubahwa mu mwanya wa Nyiricyubahiro.
Indirimbo z’ibihogere ziganjemo izisanzwe zitazwi n’abakristu
Bimwe mu bishimisha aba bitabiriye bene ibi bitaramo, ni iririmbwa ry’indirimbo abakristu baba basanzwe bakoresha mu gitambo cya Misa, Korali yenda ikaba yakongeramo ikirungo mu miririmbire, banoza amajwi cyangwa bakoresha ibikoresho bigezweho muri muzika. Atari ibyo, aba nanone bashimishwa n’udushya mu miririmbire igezweho nk’iya Solo cyangwa izindi ndirimbo zisaba ubuhanga bugezweho kabone niyo ataba ari izo guhimbaza Imana.
Kuri iki gitaramo cyo ho rero, indirimbo nyinshi zari iz’ibihogere, ni ukuvuga zitabonekamo amashyi ngo zinabyinike, kandi nanone nyinshi muri izo ntabwo ziboneka mu bitabo byiswe iby’umukristu ( Singizwa), bivuze ko nta bihe byiza byo gucinya akadiho byabonetse muri iki gitaramo.
Icyokora ikintu gishya umuntu yavuga ko cyabonetse muri iki gitaramo, ni imikezo yagaragayemo abahungu n’abakobwa b’abaririmbyi, ijya kumera nk’imishyayayo, nayo urebye ikaba itari iryoheye ijisho.
Umukoro ku byobozi bwa Paruwase Katedrale ya Ruhengeri
Niba hari umurimo wa gitumwa uruhije gukora bityo ugasaba ubwitange ni ukorwa n’abaririmbyi baboneka mu makorali anyuranye aba akorera ubutumwa kuri Paruwase no mu sentrali anyuranye.
Koko rero ni umurimo usaba gutanga igihe cyawe ngo haboneke igihe cyo gusubiramo indirimbo n’uwo kuziririmba, ubushobozi bwo kwiga indirimbo nshya no kugorora amajwi utaretse n’ibindi byinshi bisabwa abaririmbyi harimo kugura uniforme kenshi( hari abagura uko umwaka utashye), kwishingira ingendo zo gusura andi makorali ndetse no kuba bandebereho mu bakristu ufata iya mbere mu gutanga ibisabwa na Kiliziya harimo n’amaturo anyuranye.
Ibintu birushaho gukomerana abaririmbyi igihe korali ihisemo gutegura ibitaramo nk’iki Korali Magnficat iheruka gukora kuko bisaba amikoro ahambaye, akaba ari nayo mpamvu atari korali ibonetse yose itegura bene biriya bitaramo.
Koko rero, ibi bitaramo bisaaba imyiteguro ihambaye,abaririmbyi bagasabwa kubona kensi kurusha uko bari basanzwe baboneka nko mu gihe cy’amezi 2, 3, hagashakishwa abandi bahanga mu muzika korali itari isanzwe ifite ndetse n’ibikoresho bishyashya Korali itari isanzwe nabyo ifite.
Abaririmbyi kandi basabwa byanze kugurirwa uniforme nziza kandi yisimbuyeho guhenda ugereranije n’izo abaririmbyi bari basanzwe bambara, ariko muri ibyo byose igihenda kuri Korali ni ikiguzi cy’aho gukorera ibitaramo n’icya sonorisation, Nk’ubwo muri nk’iriya salle ya pastorale ya Diyoseze, gukoreramo igitaramo ntihishyurwa atari munsi y’ibihumbi 500, naho sonorisation igezweho nk’iriya ya TOP 5 SAI Ltd, ni hejuru ya miliyoni.
Muri rusange, gukoresha kiriya gitambo bisaba nibura atari munsi ya miliyoni 3 kandi abaririmbyi nibo bagomba kwirya bakimara uretse ko iyo Korali igize amahirwe ihabwa inkunga n’incuti zayo ( Korali ubusanzwe zigira itsinda ry’incuti zayo), ubundi bagacungira ku mafranga make aba ari mu isanduku akomoka ku bihembo baba babonye baririmba mu birori binyuranye.
Iyi niyo mpamvu Virunga Today ibona ubuyobozi bwa Paruwase bwagombye kurushaho gutanga ubufasha ku makorali, bagatera inkunga ihagije ibi bikorwa ( ntabwo twigeze tumenya uruhare Paruwase igira muri iki gikorwa).
Ibi byashoboka habayeho ubukangurambaga ku bakristu, ubuyobozi bwa Paruwase bugakangurura abakristu kwitabira amahururiro atera inkunga amakorali, hakaba habaho n’uburyo buhoraho bwo gukusanya inkunga igenewe amakorali ariko cyane cyane, Korali zigafashwa gukora ibitaramo byishyuzwa aho kugira ngo ibitaramo bikomeze kwinjirirwamo ubuntu.
Ibi byo kwishyuza ibitaramo byagerwaho Korali zifashijwe kunoza ibitaramo byabo, ubwiza bwabyo bugakurura abantu benshi bityo bakaboneraho no kubyishyuza. Ibi kandi nka Korali Ishema Ryacu ikaba yarashoboye kubigeraho, igitaramo cyabo Christmas Carols Concert kikaba cyinjiza atari munsi ya miliyoni 1.
Haribazwa kandi impamvu iyi salle ya Diyoseze ikomeza kwishyuzwa akayabo amakorali kandi bizwi ko iki gitaramo nta nyungu z’amafranga igikuramo, umurimo ukorwa gusa akaba ari uwo gufasha Paruwase gukora ubutumwa.
Tibabwire ko ku bijyanye n’igitaramo ” Dutetere Umubyeyi Concert” byatangajwe ku mugaragaro ko iki gitaramo kigiye kuba ngarukamwaka, kikazajya gifasha abakristu kwitegura umunsi mukuru w’Assomption, bivuze ko kuva ubu ubuyobozi bwakagombye gushyiraho ingamba zo gukosora ibitaragenze neza no gushyira imbere ibikorwa byo kunonosora birushijeho imiririmbire.
Icyitonderwa: Mu gihe twarangizaga kwandika iyi nkuru, twahawe amakuru ko igiciro cya Salle kuri za Korali kuri ubu cyamanuwe kigashyirwa ku mafranga ibihumbi ijana, kivuye ku mafranga ibihumbi 200, ibyo kwishyura ibihumbi magana atanu byo ngo bikaba bitarigeze bibaho.
Inkuru bifitanye isano: