Gataraga: Affaire Norbert-Marita: Nyuma yo kwamburwa isambu ye, noneho asagariwe bikomeye hafi no kumukuraho akaboko
Amakuru ava mu murenge wa Gataraga akomeje kutaba meza, nyuma y’inkuru y’urugomo rwakorewe abana bibana bagasenyerwa hejuru inzu yabo bari batuyemo, bigakorwa n’uwitwa Hategekimana Norbert wameyekanye mu bikorwa by’urunguze, noneho Virunga Today yamenye n’andi makuru: ay’urundi rugomo rwakorewe umukecuru Nibagwire Marita, uru rugomo narwo rukaza kugirwamo uruhare n’uruhande rw’uyu Norbert.
Niba mwibuka neza, uyu Norbert, mu kagambane na nyakwigendera Me Mukeshimana Juliette, bateje cyamunara ubutaka bwa mukecuru Nibagwire Marita, ngo harangizwe urubanza rw’umwenda, Uyu Norbert yarezemo Kadirigi, nyamara uyu kadirigi akaba nta masano azwi ari hagati ye na mukecuru Marita. Ibi bibazo nibyo byakomeje gukururana kugeza ubu rukaba rukigeretse hagati y’uruhande rwa Marita rwambuwe ubutaka ku maherere n’uruhande rwa Nobert ukomeje kwihisha inyuma y’ibikorwa by’urunguze akanambura abaturage.
Abunzi b’akagari ka Rungu bemeje ko Marita yasubizwa ubutaka bwe, abo ku murenge wa Gataraga, bikura mu rubanza, Urw’ibanze rwa Muhoza rwemeza ko Marita nta bimeyetso bigaragaza ko umurima ari uwe, Mukeshimana waguze mbere igice cy’isambu ya Marita ararutambamira.
Nk’uko twabigarutseho mu nkuru nyinshi twakoze kuri iki kibazo cya Norbert na Marita, ibyo kuba isambu ye yaragurishijwe mu cyamunara Marita yabimenye, nyuma nk’ukwezi nk’uko abyivugira, ahitamo kugeza ikirego mu mu rukiko rw’ibanze gitambamira iyi cyamunara ariko ikirego nticakirwa kubera ko igihe cy’itambamira cyari cyararenze.
Hagati aho ubu butaka bwakomeje gukorerwa ihererekanya, mu cyamunara bugurwa n’uwitwa Pacifique, nawe waje kubugurisha Nyirajyambere muramukazi wa Marita.
Mu gukomeza gushakisha ubutabera, Marita amaze kubigrwamo inama, yaje gutanga ikirego mu rukiko rw’abunzi b’akagari ka Rungu, arega muramyukazi we kwihesha ubutaka bwe ku bw’uburiganya maze inteko y’abunzi yemeza ko ikirego cya marita gifite ishingiro kubera ko mu bitabo byandikwamo bakiriramo ibirego, hatigeze habonekamo ikirego Norbert aregamo Marita, akaba kandi nta nindi sano bafitanye.
Nyirajyambere birumvikana ntiyanyuzwe n’imyanzuro y’abaunzi b’akagari ka Rungu, ahitamo kujuririra abunzi b’umurenge wa Gataraga. Aba nabo bemeje ko ntaho Marita ahurira n’uruanza Norbert yarezemo Kadirigi, ariko bikura muri uru rubanza kubera ko babonye ko nta bubasha bahabwa n’amategeko bwo gutesha agaciro cyamunara yakozwe hubahirijwe amategeko.
Marita nawe utaranyuzwe n’imyanzuro y’abunzi b’umurenge wa Gataraga, yahise ajuririra icyemezo cy’abo mu rukiko rw’ibanze rwa Muhoza maze mu mwnzuro w’uru rukiko rwemeza ko Marita atsinzwe kubera ngo ko nta bimenyetso yagaragarije urukiko ko ubu butaka ari ubwe.
Hagati aho uwitwa Mukeshimana wari waraguze igice kimwe cy’ubutaka bwa Marita bukaza gutezwa cyamunara bwose uko bwakabaye, yaje gutambamira imyanzuro y’urukiko mu rukiko rw’ibanze rwa Muhoza, uru rubanza rukaba rugomba kuburansihwa mu minsi iri mbere.
Nyirajyambere n’umuhungu we babigiyemo umugambi na Norbert, bagiye kwihesha ubutaka bemeza ko batsindiye kandi imyanzuro y’urubanza itari yakabaye itegeko, urubanza rwaratambamiwe, havuka amakimbirane hakomerekeramo bikomeye Marita.
Abahaye amakuru Virunga Today, bemeza ko ubwo hari hashize ibyumweru bibiri urubanza rusomwe, uruhande rwa Nyirajyambere na Norbert rurangajwe imbere n’umuhungu we Ndahyo Joseph, rwagiye guhinga cya gipande Marita yari yaragurishije Mukeshimana, bityo arandura ingano zari hafi kwera yari yarahinzemo. Mukecuru Marita ari mubageze ahaberaga iki gikorwa cyo kwangiza imyaka bwa mbere, maze ubwo yabazaga impamvu barimo kurandura iyi myaka kandi uru rubanza rutararangira, akubitwa bikomeye n’uyu Ndahayo wahise ahunga, kugeza ubu akaba ataraboneka.
Nk’uko amafoto yao muri Radio ku bitaro bya Ruhengeri abigaragaza, uyu mukecuru , igufwa rye ryo mu kaboko ryacitseho, gato abagnga bahitamo gushyiraho isima, ibi bivuze ko bitakoroha ko uyu mukecuru ugeze mu zabukuru ko iri gufwa rye ryasubirana, bivuze ko iyi mvune izakomeza kuba twibanire.
Ngibyo rero ngayo iby’ibi bibazo by’umutekano muke bikomeje gukururwa n’umuntu umwe, ubona ko ibyo kubahiriza amategeko ntacyo bimubwiye . Muri icyo gihe kandi benshi mu batuye muri iriya mirenge ya Busogo na Gataraga abaganiriye na Virunga Today kuri iki kibazo, bakaba batabaza inzego zishinzwe umutekano n’ iz’ubtabera, ngo habe hagira igikorwa mu maguru mashya, maze hahagarikwe ibi bikorwa binyuranije n’itegeko byo gutanga urunguze, Norbert na bagenzi be bakomeje kwishoramo ari nako babangamira umutekano muri rusange w’abatuye iriya mirengE, hakanabangamirwa nanone iterambre ryabo.
Nibagwire Marita yakomerekejwe bikomeye n’uruhande rwa Norbert rwashatse kurangiza urubanza nyamara imyanzuro yarwo itari yakabaye itegeko.
Inkuru bifitanye isano: